நோட்டா வென்றால் தேர்தல் ரத்து? தேர்தல் கமிஷனுக்கு கோர்ட் நோட்டீஸ்!

புதுடில்லி :தேர்தலில் எந்த வேட்பாளருக்கும் ஓட்டளிக்க விரும்பாதவர்கள், நோட்டா எனப்படும் 'யாருக்கும் ஓட்டளிக்க விரும்பவில்லை' என்ற பட்டனை தேர்வு செய்யும் முறை கடந்த 2013 முதல் அமலில் உள்ளது.

பொதுநல மனு

இது தொடர்பாக உச்ச நீதிமன்றத்தின் உத்தரவை அடுத்து, அந்த ஆண்டு நடந்த தேர்தலில், பயன்படுத்தப்பட்ட மின்னணு ஓட்டுப்பதிவு இயந்திரங்களில், நோட்டா பட்டன் பொறுத்தப்பட்டது. ஒரு தொகுதியில் போட்டியிடும் அனைத்து வேட்பாளர்களை விட, நோட்டாவுக்கு அதிக ஓட்டுகள் கிடைத்தால், அதற்கு அடுத்தபடியாக உள்ள வேட்பாளர் வெற்றி பெற்றதாக அறிவிக்கப்படுவர் என்ற விதிமுறை தற்போது உள்ளது. இதனால், ஒரு தொகுதி யில் அதிகப்படியான ஓட்டுகள் நோட்டாவுக்கு விழுந்திருந்தால், அங்கு மீண்டும் தேர்தல் நடத்தவேண்டும் என்ற கோரிக்கைகள், சமீபகாலமாக வலுத்து வருகின்றன. இந்நிலையில், டில்லியைச் சேர்ந்த சமூக செயற்பாட்டாளரும், பிரபல எழுத்தாளருமான ஷிவ் கெரா, நோட்டா தொடர்பாக பொதுநல மனுவை உச்ச நீதிமன்றத்தில் தாக்கல் செய்தார். அதில், 'ஒரு தொகுதியில் அதிகப்படியான ஓட்டுகள் நோட்டாவுக்கு பதிவாகியிருந்தால், அந்த தொகுதிக்கான தேர்தலை ரத்து செய்து, அங்கு மறு தேர்தல் நடத்த உத்தரவிட வேண்டும்.'அது மட்டுமின்றி, அந்த தொகுதியில் நோட்டாவை விட குறைவான ஓட்டுகள் பெற்ற வேட்பாளர்களை, அடுத்த ஐந்து ஆண்டுகளுக்கு அனைத்து தேர்தலிலும் போட்டியிட தடை விதிக்க வேண்டும்' என கோரிக்கை விடுத்திருந்தார். இந்த மனு தலைமை நீதிபதி டி.ஒய். சந்திரசூட், நீதிபதிகள் ஜே.பி. பர்திவாலா, மனோஜ் மிஸ்ரா ஆகியோர் அடங்கிய அமர்வு முன், நேற்று விசாரணைக்கு வந்தது. அப்போது, ஷிவ் கெரா தரப்பில் ஆஜரான மூத்த வழக்கறிஞர் கோபால் சங்கரநாராயணன் கூறியதாவது:நாடு முழுதும் லோக்சபா தேர்தல் நடந்து வரும் சூழலில், குஜராத் மாநிலம் சூரத்தில் காங்கிரஸ் வேட்பாளரின் மனுக்கள் தேர்தல் அதிகாரியால் நிராகரிக்கப்பட்டன.

உரிமை

இதைத் தொடர்ந்து, மற்ற கட்சி வேட்பாளர்கள் மற்றும் சுயேச்சைகள் தங்கள் மனுக்களை திரும்பப் பெற்றனர். இதனால், பா.ஜ., வேட்பாளர் வெற்றி பெற்றதாக அறிவிக்கப்பட்டது. அங்குள்ள மக்கள் தங்களுக்கான பிரதிநிதியை தேர்தலில் தேர்ந்தெடுக்க திட்டமிட்டிருந்த நிலையில், அவர்களது உரிமை பறிக்கப்பட்டுள்ளது. இது போன்ற சம்பவங்களைத் தடுக்க, தேர்தல்களில் மற்ற வேட்பாளர்களுக்கு இணையாக நோட்டாவையும் ஒரு வேட்பாளராக கருதி, விளம்பரப்படுத்த வேண்டும். குறிப்பிட்ட தேர்தலில் ஒரு தொகுதியில், வேட்பாளர்களைக் காட்டிலும் நோட்டா அதிக ஓட்டுகள் பெற்றால், அந்த தேர்தல் செல்லாது என, அறிவிக்க வேண்டும் அல்லது அந்த தொகுதிக்கான தேர்தலை ரத்து செய்ய வேண்டும். அனைத்து மாநில தேர்தல் ஆணையங்களுக்கும் நோட்டாவை ஒரு கற்பனை வேட்பாளராக கருதுவது குறித்து, சுற்றறிக்கை அனுப்ப வேண்டும். அவ்வாறு கற்பனை வேட்பாளராக நோட்டா அறிவிக்கப்பட்டால், அரசியல் கட்சிகள் நேர்மையான, சிறந்த வேட்பாளர்களை தேர்தலில் நிறுத்தும்.இவ்வாறு அவர் கூறினார். இதையடுத்து, தலைமை நீதிபதி டி.ஒய். சந்திரசூட் தலைமையிலான அமர்வு தன் உத்தரவில், 'இது தேர்தல் நடைமுறை பற்றிய வழக்கு. எனவே, இது தொடர்பாக தேர்தல் கமிஷன் வகுத்துள்ள விதிமுறைகளை ஆய்வு செய்ய வேண்டும். 'இது குறித்து பதிலளிக்க தேர்தல் கமிஷனுக்கு நோட்டீஸ் அனுப்ப உத்தரவு பிறப்பிக்கப்படுகிறது' என, தெரிவிக்கப்பட்டது.