இந்தியாவிடம் வீழ்ந்தது ஆப்கானிஸ்தான்: சூர்யகுமார் அரைசதம் விளாசல்

பிரிட்ஜ்டவுன்: ஆப்கானிஸ்தானுக்கு எதிரான 'சூப்பர்-8' போட்டியில் சூர்யகுமார் அரைசதம் விளாச, இந்திய அணி 47 ரன் வித்தியாசத்தில் சூப்பராக வென்றது.வெஸ்ட் இண்டீசின் பார்படாசில் (பிரிட்ஜ்டவுன்) உள்ள கென்சிங்டன் ஓவல் மைதானத்தில் நடந்த 'டி-20' உலக கோப்பை 'சூப்பர்-8' போட்டியில் இந்தியா, ஆப்கானிஸ்தான் அணிகள் மோதின. 'டாஸ்' வென்ற இந்திய கேப்டன் ரோகித் 'பேட்டிங்' தேர்வு செய்தார்.

சூர்யகுமார் அபாரம்

இந்திய அணிக்கு கேப்டன் ரோகித் சர்மா (8) சோபிக்கவில்லை. ரஷித் கான் 'சுழலில்' ரிஷாப் பன்ட் (20), கோலி (24) சிக்கினர். அடுத்து வந்த சூர்யகுமார் (செல்லமாக சூர்யா), ரஷித் பந்தில் ஒரு பவுண்டரி அடித்தார். ஷிவம் துபே (10) நிலைக்கவில்லை. பொறுப்பாக ஆடிய ஹர்திக் பாண்ட்யா, நுார் அகமது வீசிய 16வது ஓவரில் வரிசையாக ஒரு பவுண்டரி, ஒரு சிக்சர் விளாசினார். பரூக்கி பந்தில் ஒரு சிக்சர், ஒரு பவுண்டரி அடித்த சூர்யகுமார், 27 பந்தில் அரைசதம் கடந்தார். இவர் 53 ரன்னில் ஆட்டமிழந்தார். ஹர்திக் பாண்ட்யா (32) ஓரளவு கைகொடுத்தார். ரவிந்திர ஜடேஜா (7) நிலைக்கவில்லை. அக்சர் (12) 'ரன்-அவுட்' ஆனார். இந்திய அணி 20 ஓவரில் 8 விக்கெட்டுக்கு 181 ரன் எடுத்தது.

பும்ரா அசத்தல்

கடின இலக்கை விரட்டிய ஆப்கானிஸ்தான் அணிக்கு பும்ரா தொல்லை தந்தார். இவரது 'வேகத்தில்' ரஹ்மானுல்லா குர்பாஸ் (11), ஹஜ்ரதுல்லா ஜஜாய் (2) வெளியேறினர். அக்சர் படேல் 'சுழலில்' இப்ராஹிம் ஜத்ரன் (8) சிக்கினார். குல்தீப் யாதவ் பந்தில் குல்பதின் நைப் (17), முகமது நபி (14) அவுட்டாகினர். அஸ்மதுல்லா உமர்ஜாய் (26) ஆறுதல் தந்தார். தொடர்ந்து அசத்திய பும்ரா பந்தில் நஜிபுல்லா ஜத்ரன் (19) 'பெவிலியன்' திரும்பினார்.அர்ஷ்தீப் சிங் பந்தில் கேப்டன் ரஷித் கான் (2), நவீன்-உல்-ஹக் (0), நுார் அகமது (12) ஆட்டமிழந்தனர். ஆப்கானிஸ்தான் அணி 20 ஓவரில் 134 ரன்னுக்கு 'ஆல்-அவுட்டாகி' தோல்வியடைந்தது. பரூக்கி (4) அவுட்டாகாமல் இருந்தார்.