டிட்வா புயல் எதிரொலி: செங்கையில் முன்னெச்சரிக்கை நடவடிக்கை

செங்கல்பட்டு: ''செங்கல்பட்டு மாவட்டத்தில், மிக அதிக அளவில் வெள்ள பாதிப்பு ஏற்படக்கூடிய பகுதிகளாக 71 இடங்கள் கண்டறியப்பட்டு உள்ளன,'' என, கலெக்டர் சினேகா தெரிவித்தார். வங்கக்கடலில் இலங்கை அருகே உருவான 'டிட்வா' புயல், சென்னை மற்றும் வடமாவட்டங்களை நோக்கி நகர்கிறது. இதனால், செங்கல்பட்டு உட்பட நான்கு கடலோர மாவட்டங்களில், அதிக கனமழைக்கான 'ரெட் அலெர்ட்' எச்சரிக்கை, வானிலை ஆய்வு மையத்தால் விடுக்கப்பட்டுள்ளது. இதனால், செங்கல்பட்டு மாவட்ட நிர்வாகம் முன்னெச்சரிக்கை மற்றும் பாதுகாப்பு நடவடிக்கைகளை எடுத்துள்ளது. மாவட்டத்தில், அவசர சூழ்நிலையில் மக்கள் தங்குவதற்காக, 287 வெள்ள நிவாரண முகாம்கள், 20 புயல் பாதுகாப்பு மையங்கள் தயார் நிலையில் உள்ளன. கூடுதலாக கானாத்துார், நெம்மேலி, பட்டிபுலம் ஆகிய இடங்களில், மூன்று பல்நோக்கு புயல் பாதுகாப்பு மையங்கள் செயல்பாட்டில் உள்ளன. மாவட்டத்தில், 390 இடங்கள் வெள்ள பாதிப்பு ஏற்படும் இடங்களாக கண்டறியப்பட்டு உள்ளன. மிக அதிக அளவில் வெள்ள பாதிப்பு ஏற்படக்கூடிய பகுதிகளாக 71 இடங்கள் கண்டறியப்பட்டு உள்ளன. மாவட்டத்தில், 54 இடங்களில், சமையலறைகள் தயார் நிலையில் உள்ளன. மின்வாரியம் மூலமாக, மின்கம்பங்கள் மற்றும் உபகரணங்கள் கையிருப்பில் வைக்கப்பட்டு உள்ளன. இந்த பகுதிகளுக்கு உணவு மற்றும் அத்தியாவசிய தேவைகளுக்கான அனைத்து வசதிகளும் தயார் நிலையில் வைக்கப்பட்டுள்ளன. மீட்பு நடவடிக்கைகளுக்கு தேவையான படகுகள், இயந்திர படகுகள், மர அறுவை இயந்திரங்கள், தண்ணீர் இரைக்கும் இயந்திரங்கள், 'பொக்லைன், கிரேன்' இயந்திரங்கள், மின்னாக்கிகள், டிராக்டர் உள்ளிட்டவை தயார் நிலையில் உள்ளன. மேலும், வெள்ள தடுப்பு பணிகளுக்காக மணல் மூட்டைகள் கையிருப்பில் வைக்கப்பட்டுள்ளன. அரசு மருத்துவக்கல்லுாரி மருத்துவமனை மற்றும் அரசு மருத்துவமனைகளில் டாக்டர்கள், செவிலியர்கள் 24 மணி நேரமும் பணியில் இருக்க உத்தரவிடப்பட்டுள்ளது. தேவையான மருந்துகள், மருத்துவ உபகரணங்களை கையிருப்பில் வைத்திருக்க, மருத்துவமனை நிர்வாகங்களுக்கு அறிவுறுத்தப்பட்டு உள்ளது. மேலும், மருத்துவமனைகளில் 'ஜெனரேட்டர்'கள் தயார் நிலையில் உள்ளது உறுதி செய்யப்பட்டுள்ளது. அத்துடன், 4 முதல் 5 நாட்களுக்குள் பிரசவிக்கும் நிலையில் உள்ள கர்ப்பிணியருக்கு முன்னெச்சரிக்கை நடவடிக்கையாக, முன்கூட்டியே மருத்துவமனைகளில் அனுமதிக்க வேண்டும் என கூறப்பட்டுள்ளது. மாவட்டம் முழுதும் 33 மண்டல அளவிலான பல்துறை கண்காணிப்பு குழுக்கள் அமைக்கப்பட்டுள்ளன. கலெக்டர் அலுவலகத்தில், அவசரகால கட்டுப்பாட்டு அறை இயங்கி வருகிறது. பொதுமக்கள் 'டிட்வா' புயலினால் பாதிப்பு ஏற்பட்டால், கலெக்டர் அலுவலகத்தில் உள்ள கட்டுப்பாட்டு அறையை தொடர்பு கொள்ளலாம் என, கலெக்டர் சினேகா தெரிவித்துள்ளார். சப்-கலெக்டர் ஆய்வு வங்கக் கடலில் மையம் கொண்டுள்ள 'டிட்வா' புயல் காரணமாக கனமழை எச்சரிக்கை விடுக்கப்பட்டுள்ள நிலையில், முன்னெச்சரிக்கை நடவடிக்கையாக, செங்கல்பட்டு சப் - கலெக்டர் மாலதி ஹெலன், மாவட்ட ஆதிதிராவிடர் நலத்துறை அலுவலர், திருப்போரூர் தாசில்தார் சரவணன் உள்ளிட்ட அதிகாரிகள் குழுவினர், திருப்போரூர் வட்டத்தில் உள்ள பகுதிகளில் ஆய்வு மேற்கொண்டனர். அப்போது, காலவாக்கம் தீயணைப்பு நிலையத்தில் மீட்பு பணி தயார் நிலை தொடர்பாக ஆய்வு மேற்கொண்டு, அதற்கான உபகரணங்கள் குறித்து விசாரித்தனர். தொடர்ந்து, தையூர் கிராமத்தில் தாழ்வான பகுதிகளை ஆய்வு செய்தனர். அதே போல், பட்டிப்புலம் கிராமத்தில் உள்ள இருளர் பகுதிகளை ஆய்வு செய்ததில், அங்கிருந்த 20க்கும் மேற்பட்ட இருளர் குடும்பத்தினரை, அதே பகுதியில் உள்ள சமூகநலக்கூடத்தில் தங்குமாறு அறிவுறுத்தினர். அவசர கால கட்டுப்பாட்டு அறை தொலைபேசி எண்கள்: 044 - 2742 7412-14 மற்றும் 'வாட்ஸாப்' எண்: 94442 72345 ஆகிய எண்களில் பொதுமக்கள் தொடர்பு கொள்ளலாம்.

மீட்பு குழுவினர் தயார்

மழை மற்றும் 'டிட்வா' புயல் காரணமாக, வெள்ளம் உள்ளிட்ட பாதிப்புகள் ஏற்பட வாய்ப்புள்ளதால், அதை சமாளிக்கவும், பொது மக்களை பாதுகாப்பான இடத்திற்கு அழைத்துச் செல்லவும், பேரிடர் மீட்பு குழு தயார் நிலையில் வைக்கப்பட்டுள்ளதாக, கலெக்டர் சினேகா தெரிவித்திருந்தார். அதன்படி, வண்டலுார் தாலுகா, கூடுவாஞ்சேரி, அரசினர் மகளிர் மேல்நிலைப் பள்ளியில், 25 வீரர்கள் இடம்பெற்றுள்ள, தமிழ்நாடு பேரிடர் மீட்பு குழுவினர், உதவி ஆய்வாளர் சதக்கத்துல்லா தலைமையில், மீட்பு பணி உபகரணங்களுடன் தயார் நிலையில் உள்ளனர்.