ரயில்வே யார்டு புதுப்பிப்பு பணி; ரயில்கள் இயக்கத்தில் மாற்றம்

கோவை : போத்தனுார் ரயில்வே யார்டு புதுப்பிப்பு பணிகள் நடக்க உள்ளன. இதை முன்னிட்டு நாளை பல்வேறு ரயில்களின் இயக்கத்தில் மாற்றம் செய்யப்பட்டுள்ளது.அதன்படி, பாலக்காட்டில் இருந்து காலை 6:30 மணிக்கு புறப்படும், பாலக்காடு டவுன் - திருச்சி(16844) எக்ஸ்பிரஸ் ரயில், நாளை போத்தனுார் - இருகூர் வழித்தடத்தில் இயக்கப்படும். கோவை, வடகோவை, பீளமேடு ரயில்வே ஸ்டேஷன்கள் செல்லாது.பாலக்காடு - கோவை (66606), பொள்ளாச்சி - கோவை(56110), சொரனுார் - கோவை (56604) ஆகிய ரயில்கள், நாளை போத்தனுார் வரை மட்டுமே இயக்கப்படும்.மேட்டுப்பாளையம் - போத்தனுார்(66611) ரயில் நாளை கோவை ரயில்வே ஸ்டேஷன் வரை மட்டுமே இயக்கப்படும். போத்தனுாரில் இருந்து காலை 9:40 மணிக்கு புறப்படும் போத்தனுார் - மேட்டுப்பாளையம்(66612) மெமு ரயில், நாளை போத்தனுாருக்கு பதில் கோவை ரயில்வே ஸ்டேஷனில் இருந்து, காலை 9:55 மணிக்கு புறப்படும்.