குறிஞ்சிப்பாடி சட்டசபை தொகுதியில் இரவு 7:30 மணி வரை நடந்த ஒட்டுப்பதிவு

வடலுார் : குறிஞ்சிப்பாடி தொகுதியில் இரவு 7:30 மணி வரை நடந்த ஓட்டுப்பதிவில் 77.09சதவீதம் ஓட்டுப்பதிவு நடந்துள்ளது. குறிஞ்சிப்பாடி தொகுதியில் ஆண் வாக்காளர்கள் 1 லட்சத்து 21 ஆயிரத்து 274 பேரும்,பெண் வாக்காளர்கள் 1 லட்சத்து 25 ஆயிரத்து 294 பேரும்,மற்றவை 39 என மொத்தம் 2 லட்சத்து 46 ஆயிரத்து 607 பேரும் உள்ளனர். நேற்று நடந்த லோக்சபா தேர்தலுக்காக 259 வாக்குச்சாவடி மையங்கள் அமைக்கப்பட்டிருந்தது.நேற்று காலை 7 மணிக்கு வாக்குப்பதிவு துவங்கியது. தொகுதிக்குட்பட்ட பச்சையங்குப்பம், கள்ளையங் குப்பம், நொச்சிக்குப்பம், விலங்கல்பட்டு, குருவப்பன்பேட்டை ஆகிய ஓட்டுச்சாவடிகளில் மின்னணு இயந்திரங்கள் பழுதாகி சிறிது நேரத்தில் வேறு இயந்திரங்கள் மாற்றப்பட்டு ஓட்டுப்பதிவு நடந்தது. மேலும் காலை 7;00 மணி முதல் இரவு 7.30 மணி வரை வாக்காளர்கள் நீண்ட வரிசையில் காத்திருந்து அமைதியான முறையில் வாக்களித்தனர். அகரம், வானமாதேவி, குமளங்குளம் ஆகிய பகுதிகளில் 6 மணிக்கு மேல் வாக்காளர்களுக்கு டோக்கன் வழங்கப்பட்டு இரவு 7.30 மணி வரை வாக்குப்பதிவு நடந்தது. தொகுதியின் பல இடங்களில் மத்திய துணை ராணுவப் படையினர் பாதுகாப்புப் பணியில் ஈடுபடுத்தப்பட்டிருந்தனர். தொகுதியின் இறுதி ஓட்டுப்பதிவு நிலவரப்படி 77.09 சதவீதம் ஓட்டுப் பதிவானது.