திட்டக்குடியில் மினி ஸ்டேடியம்   மாணவர்கள், இளைஞர்கள் கோரிக்கை

திட்டக்குடி;திட்டக்குடி சட்டசபை தொகுதியில் மினி ஸ்டேடியம் அமைக்க வேண்டும் என மாணவர்கள், இளைஞர்கள் கோரிக்கை விடுத்துள்ளனர். தமிழகத்தில் உள்ள அனைத்து சட்டசபை தொகுதிகளிலும் மினி ஸ்டேடியம் அமைக்கப்படும் என, துணை முதல்வர் உதயநிதி அறிவித்துள்ளார். இதற்காக, அந்தந்த தொகுதிகளிலும் குறைந்தபட்சம் 5 ஏக்கர் பரப்பளவில் ஸ்டேடியம் அமைக்க 3 கோடி ரூபாய் ஒதுக்கப்படும். அதில், 400 மீ., ஓடுதளம், அலுவலகம், கேலரி, கைப்பந்து, வலைப்பந்து, கபடி, கோ கோ, கால்பந்து ஆடுகளங்கள், கழிவறை வசதிகளும் அடங்கும். இதன் மூலம் திறமை வாய்ந்த இளம் வீரர்களை உருவாக்கி விளையாட்டுத்துறையை உயர்த்த முடிவு செய்யப்பட்டது. சட்டசபை தொகுதியில் மினி ஸ்டேடியம் அமைக்க சம்பந்தப்பட்ட துறை அதிகாரிகள் நடவடிக்கை எடுக்க வேண்டும் என மாணவர்கள், இளைஞர்கள் கோரிக்கை விடுத்துள்ளனர். இது குறித்து விளையாட்டு ஆர்வலர்கள் கூறியதாவது: இந்த தொகுதி விளையாட்டு வீரர்கள் மாநில அளவிலான பல போட்டிகளில் பங்கேற்று விருதுகள் பெற்று வருகின்றனர். பின்தங்கிய இப்பகுதியில் முறையாக பயிற்சி பெற மைதானமும், பயிற்சியாளர்களும் இல்லை. இதனால் தொகுதிக்குட்பட்ட இளைஞர்கள், பள்ளி, கல்லுாரி மாணவர்கள் மாவட்ட, மாநில அளவிலான போட்டிகளில் பங்கேற்க முடியாமல் புலம்பி வருகின்றனர். இது குறித்து சம்மந்தப்பட்ட அதிகாரிகள் உரிய நடடவடிக்கை மேற்கொள்ள வேண்டும். இவ்வாறு அவர்கள் கூறினர்.