ராமர் சிலை வாங்க மக்கள் ஆர்வம்

திருநகர்: விளாச்சேரியில் பொம்மை தயாரிப்போரிடம் ராமர் சிலையை வாங்குவதற்காக ஏராளமானோர் ஆர்டர் செய்கின்றனர்.இங்கு 200க்கும் மேற்பட்ட குடும்பத்தினர் சீசனுக்கு தகுந்தாற்போல் களிமண், பிளாஸ்டர் ஆப் பாரீஸ், காகிதக் கூழ் ஆகியவற்றால் சுவாமி சிலைகள், கிறிஸ்துமஸ் குடில்கள், அலங்கார பொருட்கள் தயாரிக்கின்றனர். தற்போது கொலு பொம்மைகள் தயாரிக்கும் பணியை துவக்கி உள்ளனர். அவர்களிடம் கொலு பொம்மைகள் வாங்க வருவோரில் பலர் ராமர் சிலைகளை அதிகளவில் விரும்பி கேட்கின்றனர்.பொம்மை தயாரிப்பு பணியில் உள்ள ராமலிங்கம் கூறியதாவது: எல்லா வகையான கொலு பொம்மைகளையும் தயாரித்து விற்பனை செய்கிறோம். இந்த ஆண்டு அயோத்தியில் ராமர் கோயில் கட்டப்பட்ட பின்பு ஏராளமானோர் ராமர் சிலைகளை அதிகம் விரும்புகின்றனர். அதனை கேட்டு ஆர்டர் செய்கின்றனர். கடந்தாண்டுகளில் தயாரித்த ராமர் சிலைகளுடன் இந்தாண்டு சீதை, லட்சுமணர், ஆஞ்சநேயருடன் ராமர், ராமர் பட்டாபிஷேகம், சஞ்சீவி மலை, குகன் ஓடம், சீதா திருக்கல்யாணம், அகலிகை சாப விமோசனம், அசோக வனம், அனுமன் சேனை, ராமர் பாலம் (சேது பந்தனம்) ஆகிய சிலைகளை அதிகம் தயாரிக்க உள்ளோம் என்றார்.