ரயில் நிலையத்தில் சேதமடைந்து விழுந்த பலகை: மக்கள் அச்சம்

ராமநாதபுரம்: ராமநாதபுரம் ரயில் நிலைய கூரையின் மேல் மழைநீர் தேங்கியதால், கூரையின் கீழ் இருந்த பலகை சேதமடைந்து கீழே விழுந்தால் பயணிகள் அச்சமடைந்துள்ளனர். ராமநாதபுரம் ரயில் நிலையத்தில் வெப்பத்தை கட்டுப்படுத்துவதற்காக கான்கிரீட் கூரையின் கீழ் பலகை அமைக்கப்பட்டிருந்தது. கடந்த இருநாட்களாக பெய்த கனமழை காரணமாக கான்கிரீட் கூரையில் தண்ணீர் தேங்கி அவை பலகையில் இறங்கின. இதனால் ரயில் நிலைய முன்பதிவு மையம் முன்பு உள்ள கூரை பலகை பெயர்ந்து விழுந்தது. அதிர்ஷடவசமாக அப்பகுதியில் ஆட்கள் இல்லாததால் யாருக்கும் பாதிப்பில்லை. சமீபத்தில் ரயில் நிலைய கூரையில் இருந்து மழைநீர் அருவி போல் கொட்டிய நிலையில் தற்போது கூரை பெயர்ந்து விழுந்துள்ளது. ரயில் நிலையம் முறையான பராமரிப்பின்றி இயங்குவதாக பயணிகள் வேதனை தெரிவித்தனர்.