புது கட்டணங்களை திரும்ப பெறாவிட்டால் டிரைலர் லாரிகள் ஸ்டிரைக்: சங்கம் அறிவிப்பு

சென்னை: 'புது மோட்டார் வாகன சட்டத்தின் மூலம் உயர்த்தப்பட்ட கட்டணங்களை திரும்ப பெறாவிட்டால், தமிழகம் முழுதும் லாரிகள் இயங்காது' என, அனைத்து டிரைலர் உரிமையாளர்கள் சங்கத்தினர் தெரிவித்தனர். தொழில் மற்றும் பொருளாதார வளர்ச்சியில், மோட்டார் தொழில் முக்கிய பங்காற்றி வருகிறது. இந்நிலையில், புதிய மோட்டார் வாகன சட்டத்தை, மத்திய அரசு அமல்படுத்தியுள்ளது. அதற்கு எதிர்ப்பு தெரிவித்து ராயபுரம், கிழக்கு மாதா கோவில் தெருவில் உள்ள அனைத்து டிரைலர் உரிமையாளர்கள் சங்க அலுவலகத்தில், செய்தியாளர்கள் சந்திப்பு நடந்தது. இதில், அவர்கள் கூறியதாவது: சென்னை, காஞ்சிபுரம், செங்கல்பட்டு, திருவள்ளூர் ஆகிய மாவட்டங்களில், கன்டெய்னர் லாரி தொழிலில், 5,000க்கும் மேற்பட்ட குடும்பத்தினர் ஈடுபட்டு வருகின்றனர். ஏற்கனவே டீசல் விலை உயர்வால், நஷ்டம் ஏற்பட்டு வருகிறது. இந்த நிலையில், மத்திய அரசு, பழைய வாகனங்கள் புதுப்பிப்பு கட்டணத்தை பல மடங்கு உயர்த்தியுள்ளது. குறிப்பாக, கனரக வாகனங்களுக்கான கட்டணம், 850 ரூபாயில் இருந்து 28,000 ரூபாயாக உயர்த்தப்பட்டு உள்ளது. மேலும், ஒரு லாரிக்கு ஆண்டிற்கு 15,000 முதல் 20,000 ரூபாய் வரை போக்குவரத்து போலீசாரால் 'ஆன்லைன்' அபராதம் விதிக்கப்படுகிறது. இது, லாரி உரிமையாளர்கள், மோட்டார் தொழிலை நம்பி உள்ளோரிடம், அதிருப்தியை ஏற்படுத்தி உள்ளது. எனவே, புதிதாக அமல்படுத்தப்பட்ட வாகனச் சட்டத்தை, மத்திய அரசு 10 நாட்களுக்குள் திரும்ப பெற வேண்டும். இல்லாவிடில், சென்னையில் உள்ள மூன்று துறைமுகங்கள் மட்டுமல்லாமல், அனைத்து தோழமை சங்கங்களையும் ஒன்றிணைத்து, தமிழகம் முழுதும் லாரிகளை இயக்க மாட்டோம். இவ்வாறு அவர்கள் கூறினர்.