துரித உணவு தவிர்ப்போம் ஆரோக்கியம் பேணுவோம்

அதிகரித்து வரும் புற்றுநோய்களில் வயிற்றுப் புற்றுநோயும் ஒன்று. ஆரம்பத்தில் எந்த அறிகுறியும் தெரியாமல் இருப்பதால், பலர் தாமதமாகவே மருத்துவரை அணுகுகின்றனர். ஆரம்பத்தில் கண்டுபிடித்தால் முழுமையாக குணப்படுத்தவும் முடியும். நவம்பர் 30ம் தேதி வயிற்று புற்றுநோய் விழிப்புணர்வு தினமாக கடைபிடிக்கப்படுகிறது. ஏன் ஏற்படுகிறது? அகில இந்திய பொது மருத்துவ ஆராய்ச்சி கழக இயக்குனர் முருகநாதன், நம்முடன் பகிர்ந்தவை: அதிக உப்பு, ஊறுகாய், புகையிலை, மது, எச்.பைலோரி என்ற பாக்டீரியா, குடும்பத்தில் புற்றுநோய் வரலாறு, நீண்டகால வயிற்றுப்புண், காஸ்ட்ரைட்டிஸ் போன்ற பல காரணங்களால் ஏற்படுகிறது. ஆரம்ப அறிகுறிகள் அடிக்கடி செரிமானக் கோளாறு, உடம்பு எரிச்சல், வயிறு நிரம்பிய உணர்வு, உணவு விழாமல் இருப்பது, உணர்ச்சி குறைபாடு, திடீர் எடை குறைவு, கறுப்பு அல்லது ரத்தத்துடன் கூடிய மலச்சிக்கல், அடிக்கடி வாந்தி போன்ற அறிகுறிகள் தொடர்ந்து இருந்தால் அலட்சியப்படுத்தக் கூடாது. தவிர்க்க வேண்டியவை அதிக உப்பு, காரம், எண்ணெய், புகை சார் உணவு, புகையிலை, சிவப்பு இறைச்சி போன்றன கூடாது. கண்ட கண்ட தலைவலி, வலி மாத்திரைகள் சாப்பிடக்கூடாது. உணவில் மைக்ரோ பயாட்டா இருக்கிறது. தயிர் மற்றும் பழங்களில் அதிகம் இருக்கிறது. இது எல்லா நோய்களையும் தடுக்க வல்லது. செயற்கை உணவுகள், அதிக உப்பு போன்றவற்றால் இது குறையத்தொடங்கும். இரவு வேலை செய்பவர்கள், அதிகம் 'பாஸ்ட் புட்' என்னும் துரித உணவு சாப்பிடுவர். துரித உணவு, துரிதமாக கல்லறைக்கு வழிவகுக்கும். முடிந்தளவு வீட்டில் உள்ளவாறு எளிய உணவு நல்லது. தடுக்கும் உணவுகள் காய்கறிகள், பழங்கள், நார்ச்சத்துள்ள உணவுகள், எளிதில் செரிக்கும் உணவுகள், அதிக காரம், உப்பு, எண்ணெய் இல்லாத உணவுகள் புற்றுநோயை தடுக்க வல்லது. தாவர உணவுகள் மட்டும் உண்பவர்க்கு புற்றுநோய் வரும் வாய்ப்பு குறைகிறது. தடுப்பது எப்படி? 40 வயதுக்கு மேலானோர் ஆண்டுக்கொருமுறை எண்டோஸ்கோப்பி பரிசோதனை செய்து கொள்வது நல்லது. எச்.பைலோரி இருப்பதை பரிசோதிப்பது, எளிதில் செரிக்கும் எளிய உணவுகள் உண்டு, வாழ்க்கை முறை மாற்றம், வெளியிடத்தில் சாப்பிடுவதை தவிர்த்தல், நேரத்தில் சாப்பிடுதல், போன்ற வழிகளை கடைபிடிக்கலாம். வாழ்க்கை முறை தியானம், நல்ல உறக்கம், சரியான உடற்பயிற்சி, சீரான உணவு கடைபிடிக்க வேண்டும். வாய் விட்டு சிரிக்க வேண்டும். நல்ல எண்ணங்களை வளர்த்துக் கொண்டு, பிறரிடம் அன்பு காட்டி உதவ வேண்டும். கோபம், பொறாமை இருக்கக்கூடாது. இப்படி இருந்தால் நோய்கள் வருவது தடுக்கப்படும். சிகிச்சை முறைகள் மருந்துகள், கதிர்வீச்சு, கீமோதெரபி, அறுவை சிகிச்சை, பரவுதலைக் கண்டறிய பெட் ஸ்கேன் இருக்கிறது. ஆரம்பத்தில் கண்டறிந்தால் மருந்தில் சரிபடுத்தலாம். தாமதித்தால் 'நோடல்' என்னும் நெறி கட்டுதல் ஏற்பட்டு மூளை, நுரையீரல், கல்லீரல் வரை பரவி மஞ்சள் காமாலையும் வரும். மருத்துவமும் கடினமாகும். அதற்காகவே, ஆரம்பத்தில் கண்டறிய வேண்டும். புற்றுநோய் தடுப்பது சாத்தியமானதா என்பது கேள்வியே; ஆனால் ஆரம்பத்தில் கண்டறிந்தால் குணப்படுத்தலாம். - இன்று(நவ. 30) வயிற்றுப் புற்றுநோய் விழிப்புணர்வு தினம். திருப்பூரில் பாதிப்பு அதிகம் 2018 தரவு படி, திருப்பூரில் மொத்த புதிய புற்றுநோய்கள் 2,634. அதில் லட்சத்திற்கு 94.7 பேர் புற்று நோயால் பாதிக்கப்பட்டுள்ளனர். குடல், வயிறு, கல்லீரல் புற்றுநோய் அதிகமாக பதிவாகும் மாவட்டங்களில் திருப்பூரும் இருக்கிறது. வயிற்றுப்புண் காலப்போக்கில் புற்றுநோயாக மாறக்கூடிய வாய்ப்பு அதிகம். வீட்டில் புற்றுநோய் இருந்தால் மரபணு ரீதியாக மற்றவர்களுக்கு வரக்கூடிய வாய்ப்பு அதிகம். 'ஏ' ரத்த வகை உள்ளவர்களுக்கு பிற ரத்த வகையினரைக் காட்டிலும் வயிற்றுப்புற்றுநோய் வருவதற்கு அதிக வாய்ப்புள்ளது. இது மரபு சார்ந்தது. - டாக்டர் முருகநாதன், இயக்குனர், அகில இந்திய பொது மருத்துவ ஆராய்ச்சி கழகம்.