விடுமுறைக்காக இ - மெயிலில் வெடிகுண்டு மிரட்டல் விடுப்பு

வேலுார்:வேலுார் காட்பாடி அருகே பள்ளி விடுமுறைக்காக தனியார் பள்ளிக்கு இ - மெயிலில் வெடி குண்டு மிரட்டல் விடுத்த மாணவனிடம் போலீசார் விசாரித்தனர்.வேலுார் காட்பாடி அடுத்த பிரம்மபுரத்தில் தனியார் பள்ளியான சிருஷ்டி குழுமம் உள்ளது. இங்கு 2 000க்கும் மேற்பட்ட மாணவ மாணவிகள் படித்து வருகின்றனர். இந்த பள்ளிக்கு நேற்று முன்தினம் இரவு இ - மெயில் வந்தது.அதில் வகுப்பறைகளில் 28 இடங்களில் வெடிகுண்டு வைத்துள்ளதாகவும் அதை உங்களால் கண்டுபிடிக்க முடியாது என மெயிலில் குறிப்பிடப்பட்டிருந்தது. அதிர்ச்சியடைந்த பள்ளி நிர்வாக தலைவர் சரவணன் போலீசில் புகார் அளித்தார்.காட்பாடி போலீசார் விசாரித்ததில் அப்பள்ளியில் ஏழாம் வகுப்பு படிக்கும் மாணவரின் இ - மெயில் முகவரியில் இருந்து வந்தது தெரிந்தது. பின்னர் மாணவரிடம் நடத்திய விசாரணையில் சமீபத்தில் தியேட்டரில் வெளியான 'ஸ்டார்' திரைப்படத்தை பார்த்து தனக்கு விடுமுறை வேண்டு மென்பதால் விளையாட்டுத்தனமாக இ - மெயிலை அனுப்பியதாக கூறினார்.இதையடுத்து மாணவரிடம் இனிமேல் இது போன்ற செயலில் ஈடுபடக் கூடாது என போலீசார் எச்சரித்து அறிவுரை கூறினர்.இதனால் நேற்று பள்ளியில் பரபரப்பு ஏற்பட்டது.