திறமையான இந்தியர்களால் அமெரிக்கா பயனடைந்துள்ளது; எலான் மஸ்க் பாராட்டு

வாஷிங்டன்: திறமையான இந்தியர்களால் அமெரிக்கா பயனடைந்துள்ளது என தொழிலதிபரும், எக்ஸ் தளத்தின் உரிமையாளருமான எலான் மஸ்க் தெரிவித்து உள்ளார்.இது தொடர்பாக பாட்காஸ்ட் நிகழ்ச்சி ஒன்றில், எலான் மஸ்க் கூறியதாவது: அமெரிக்கா திறமையான இந்தியர்களால், பெரிதும் பயனடைந்துள்ளது. அமெரிக்காவுக்கு குடியேறிய இந்தியர்களால் அமெரிக்கா மிகப்பெரிய பயனாளியாக இருந்து வருகிறது. ஜோ பைடன் நிர்வாகத்தின் கீழ், எல்லைக் கட்டுப்பாடுகள் இல்லாமல் அனைவருக்கும் முழுமையான சுதந்திரம் அளிக்கப்பட்டது. இதுபோன்ற கொள்கைகள் சட்டவிரோத குடியேற்றத்தை ஊக்குவித்தது. எச்1பி விசா திட்டத்தில் சில தவறான பயன்பாடுகள் இருந்திருப்பதாக நான் நினைக்கிறேன். ஆனால் இந்த திட்டத்தை மூட வேண்டும் என்ற எண்ணம் நிச்சயமாக இல்லை. திறமையானவர்களுக்கு எப்போதும் பற்றாக்குறை இருக்கும். எனது பார்வையில், இந்த கடினமான பணிகளைச் செய்ய போதுமான திறமையானவர்களைக் கண்டுபிடிப்பதில் எங்களுக்கு நிறைய சிரமங்கள் இருப்பது எனக்குத் தெரியும், எனவே இன்னும் திறமையானவர்கள் இருந்தால் நல்லது. இவ்வாறு எலான் மஸ்க் கூறினார்.