பெலகாவி கூட்டத்தொடர் 10 நாட்கள் போதாது பா.ஜ., - ம.ஜ.த., தலைவர்கள் வலியுறுத்தல்

பெங்களூரு: 'அடுத்த மாதம் துவங்கும் பெலகாவி குளிர்கால சட்டசபை கூட்டத்தொடரில், மாநிலத்தின் வட மாவட்டங்களின் பிரச்னை தொடர்பாக விவாதிக்க வேண்டும். எனவே, கூட்டத்தை 20 நாட்கள் நடத்த வேண்டும்' என, பா.ஜ., - ம.ஜ.த., ஒருங்கிணைப்பு குழு கூட்டத்தில் தீர்மானிக்கப்பட்டது. பெங்களூரில் தனியார் ஹோட்டலில் பா.ஜ., - ம.ஜ.த., ஒருங்கிணைப்பு குழு கூட்டம் நேற்று நடந்தது. சட்டசபை எதிர்க்கட்சி தலைவர் அசோக், மேல்சபை எதிர்க்கட்சி தலைவர் சலவாதி நாராயணசாமி, பா.ஜ., கொறடா ரவிகுமார், மத்திய கனரக தொழில்துறை அமைச்சர் குமாரசாமி, எம்.எல்.ஏ., ரேவண்ணா, சட்டசபை ம.ஜ.த., தலைவர் சுரேஷ் பாபு, எம்.எல்.சி., போஜேகவுடா, நிகில் குமாரசாமி ஆகியோர் பங்கேற்றனர். கூட்டத்துக்கு பின் குமாரசாமி கூறுகையில், ''குளிர்கால கூட்டத்தொடரை, 10 நாட்கள் நடத்த அரசு முடிவு செய்துள்ளது. மாநிலத்தின் வட மாவட்டங்களில் பல பிரச்னைகள் உள்ளன. குறைந்த நாட்களில் இப்பிரச்னைகளுக்கு தீர்வு காண முடியாது. எனவே, குறைந்தது 20 நாட்களாவது கூட்டம் நடத்த வேண்டும்,'' என்றார். அசோக் கூறுகையில், ''நாங்களும் கூட்டத்தொடர் நடத்துகிறோம் என்ற 'ஷோ'வுக்காக நடத்துகின்றனர். வட மாவட்ட மக்களின் பிரச்னைகளுக்கு தீர்வு காண்பதற்காகவே, பெலகாவி கூட்டத்தொடர் நடத்தப்படுகிறது. ''ஆனால் காங்கிரஸ் அரசோ, பெங்களூரில் உள்ள பிரச்னைகளை, இக்கூட்டத்தொடரில் விவாதத்துக்கு கொண்டு வருகிறது. ''இரு கட்சிகளின் எம்.எல்.ஏ.,க்கள், எம்.எல்.சி.,க்கள், எம்.பி.,க்கள், சித்தராமையாவின் 'முடா' முறைகேடு, வால்மீகி கார்ப்பரேஷனில் அன்னிய செலாவணி, சின்னசாமி மைதான கூட்ட நெரிசல் சம்பவம் என, மாநில அரசின் மோசமான நிர்வாகம், ஊழலை எதிர்த்து பா.ஜ., - ம.ஜ.த., இணைந்து போராட்டம் நடத்தி உள்ளது. எங்களுக்குள் எந்த பிரச்னையும் இல்லை. வருங்காலத்திலும் வராது,'' என்றார். தனி பெரும்பான்மையுடன் 2028ல் ம.ஜ.த., ஆட்சி அமைக்குமா? என்ற கேள்விக்கும்; பெலகாவி கூட்டத்தொடரில், மாநில அரசு மீது நம்பிக்கையில்லா தீர்மானம் கொண்டு வரப்படுமா என்ற கேள்விக்கும் இரு கட்சி தலைவர்களும் பதிலளிக்கவில்லை.