காங்., நிர்வாகிகள் சந்திப்பை ரத்து செய்த கிரிஷ் சோடங்கர்

தமிழக காங்கிரஸ் மேலிட பொறுப்பாளர் கிரிஷ் சோடங்கருடன், கட்சியின் முன்னணி தலைவர்கள் மற்றும் மாநில நிர்வாகிகள் நேற்று சந்தித்து பேசுவதாக இருந்த நிகழ்ச்சி, திடீரென ரத்து செய்யப்பட்டது. தமிழக காங்.,கில் மாவட்டத் தலைவர்கள் மாற்றம்; தி.மு.க., கூட்டணியில், கூடுதல் தொகுதி; ஆட்சியில் பங்கு கேட்பது ஆகியவை முக்கிய பேசு பொருளாக உள்ளன. கட்சியில், அமைப்பு ரீதியாக உள்ள 74 மாவட்டங்களில், சரியாக செயல்படாத தலைவர்களை மாற்றும் பணி நடந்து வருகிறது. டில்லியிலிருந்து, மேலிடப் பார்வையாளர்கள் தமிழகம் வந்து, மாவட்டத் தலைவர்களை நியமிப்பதற்கான நேர்காணலை நடத்தி வருகின்றனர். அவர்களிடம், 'தி.மு.க., கூட்டணியில் நீடிப்பதற்கு, ஆட்சியில் பங்கு மற்றும் கூடுதல் தொகுதிகளை கேட்க வேண்டும்' என, மாநில, மாவட்ட நிர்வாகிகள், வலியுறுத்தி வருகின்றனர். இதனால், மாவட்டத் தலைவர்கள் நியமனத்தில் ஈடுபாடு காட்டுவதா அல்லது கூட்டணி குறித்து கருத்து கேட்பதா என, மேலிடப் பார்வையாளர்கள் குழப்பம் அடைந்துள்ளனர். இந்நிலையில், காங்., முன்னணி தலைவர்கள், எம்.பி.,க்கள், எம்.எல்.ஏ.,க்கள், மாநில நிர்வாகிகள், மாவட்டத் தலைவர்கள் ஆகியோரிடம் கருத்து கேட்க, கட்சியின் மேலிட பொறுப்பாளர் கிரிஷ் சோடங்கர் முடிவு செய்தார். இதற்காக, சென்னை சத்தியமூர்த்தி பவனில், நேற்று காலை 10:00 மணி முதல் மாலை 3:00 மணி வரை கிரிஷ் சோடங்கரை, காங்., நிர்வாகிகள் சந்திக்க வரலாம் என, தமிழக காங்., அமைப்பு செயலர் ராம்மோகன், கடந்த 28ம் தேதி சுற்றறிக்கை அனுப்பினார். ஆனால், நேற்று அந்நிகழ்ச்சி திடீரென ரத்து செய்யப்பட்டது. தமிழக காங்., நிர்வாகிகள் சிலர் கூறியதாவது: அ.தி.மு.க.,வில் இருந்து நீக்கப்பட்ட முன்னாள் அமைச்சர் செங்கோட்டையன், த.வெ.க.,வில் இணைந்த பின், அக்கட்சியுடன் கூட்டணி அமைப்பதற்கு, அவர் வாயிலாக பேச்சு நடத்த, காங்கிரஸ் முன்னணி தலைவர்கள் விரும்புகின்றனர். மேலும், கிரிஷ் சோ டங்கரை நேரில் சந்தித்து, 'த.வெ.க.,வுடன் காங்கிரஸ் கூட்டணி அமைக்க வேண்டும்' என, வலியுறுத்தவும் கட்சி நிர்வாகிகள் திட்டமிட்டிருந்தனர். இதை அறிந்தே, அந்த சந்திப்பு ரத்து செய்யப்பட்டதாக, ஒரு கருத்து நிலவுகிறது. அதேநேரம் புயல், மழை காரணமாக, கிரிஷ்சோடங்கர் சென்னை வரும் விமானம் ரத்து செய்யப்பட்டதால், அவரது நிகழ்ச்சி ரத்து செய்யப்பட்டுள்ளது என, மற்றொரு தரப்பினர் கூறுகின்றனர். இவ்வாறு அவர்கள் தெரிவித்தனர்.

செங்கோட்டையனை சந்தித்த திருநாவுக்கரசர்

சட்டசபை தேர்தலில், கூட்டணி கட்சிகளுடன் பேச, தமிழக காங்கிரஸ் தலைவர் செல்வப்பெருந்தகை தலைமையில், ஐவர் குழு அமைக்கப்பட்டுள்ளது. ஆனால், காங்கிரசின் ஐவர் குழுவை சந்திக்க, தி.மு.க., மேலிடம் விரும்பவில்லை. ஏனெனில், அதில் உள்ள யாருமே, அகில இந்திய காங்., பொதுச்செயலர் பதவியில் இல்லை. மேலும், கூட்டணியில் நீடிப்பதாக, காங்., தலைமை திட்டவட்டமாக இன்னும் அறிவிக்கவில்லை. இதற்கிடையே, தமிழக காங்., முன்னாள் தலைவர் திருநாவுக்கரசர், தனக்கு ஏதேனும் பதவியை பெற முயற்சித்து வருகிறார். திருமண நிகழ்ச்சிகள் உள்ளிட்டவற்றில் பங்கேற்று, தன் ஆதரவாளர்களை சந்தித்து வருகிறார். ஈரோட்டில் நேற்று முன்தினம் நடந்த ஒரு திருமண விழாவில், அவர் கலந்து கொண்டார். அதே விழாவுக்கு, த.வெ.க.,வில், சமீபத்தில் இணைந்த முன்னாள் அமைச்சர் செங்கோட்டையனும் வந்திருந்தார். இருவரும் அருகருகே அமர்ந்து, அரசியல் நிலவரம் குறித்து பேசிஉள்ளனர். அப்போது, 'த.வெ.க., கூட்டணியில் காங்கிரஸ் இடம் பெற வேண்டும். டில்லி மேலிட காங்., தலைவர்களிடம் திருநாவுக்கரசர் பேச வேண்டும்' என, செங்கோட்டையன் கேட்டுக் கொண்டதாக, காங்., வட்டாரங்கள் தெரிவிக்கின்றன. - நமது நிருபர் -