போலி மருந்து விவகாரத்தால் புதுச்சேரிக்கு புது தலைவலி; மத்திய அரசு அதிகாரிகள் கடும் கோபம்

போ லி மருந்து விவகாரத்தால், நாட்டின் பல ஆயிரம் கோடி ரூபாய்க்கு ஏற்றுமதியாகும் 'பார்மா' துறைக்கு வேட்டு வைத்துள்ள 'பகீர்' தகவல் புதுச்சேரியில் அதிர்ச்சியை ஏற்படுத்தி உள்ளது. பிரபல மருந்து தயாரிப்பு கம்பெனியான 'சன் பார்மா' நிறுவனத்தின் மருந்துகளை அதே பெயரில் போலியாக தயாரித்து, உத்தரப்பிரதேசத்தில் விற்பனை செய்த நபரை கடந்த சில மாதங்களுக்கு முன், அந்த மாநில போலீசார் கைது செய்தனர். அவரிடம் நடத்திய விசாரணையில் இந்த மருந்துகள் புதுச்சேரியில் தயாரிப்பதாக கூறியுள்ளார். அதை தொடர்ந்து புதுச்சேரி குருமாம்பேட், மேட்டுப்பாளையம் தொழிற்பேட்டை மற்றும் திருபுவனை பாளையம் ஆகிய இடங்களில் 'லார்வென்' பார்மா என்ற போலி மருந்து தொழிற்சாலை நான்கு ஆண்டுகளாக இந்த போலி மருந்து தயாரிப்பில் ஈடுபட்டு வந்ததை புதுச்சேரி மருந்து தர கட்டுப்பாட்டு அதிகாரிகள், சி.பி.சி.ஐ.டி. போலீசார் நடத்திய சோதனையில் கண்டறிந்தனர். அதையொட்டி, போலி மருந்து தொழிற்சாலையை நடத்திய ரெட்டியார் பாளையத்தைச் சேர்ந்த ராஜா என்பவரை தேடி வருகின்றனர். இந்தப் போலி மருந்துகளை மொத்தமாக விற்பனை செய்து வந்த சீர்காழி ராணா காரைக்குடி மெய்யப்பன் ஆகியோர் கைது செய்யப்பட்டு, 40 கோடி ரூபாய் மதிப்புள்ள போலி மருந்துகள், குடோனுடன் 'சீல்' வைத்துள்ளனர். கடந்த நான்கு ஆண்டுகளாக இந்த தொழிற்சாலை புதுச்சேரியின் தொழிற்பேட்டையான மேட்டுப்பாளையம் மற்றும் திருபுவனை பாளையத்தில் பொதுமக்கள் அதிக புழக்கம் உள்ள பகுதியில் லைசென்ஸ் இல்லாமல் இயங்கி வந்ததை புதுச்சேரி மருந்து கட்டுப்பாட்டு தர அதிகாரிகள், போலீசார், நகராட்சி, கொம்யூன் பஞ்., அதிகாரிகள், தொழிற்சாலை ஆய்வாக அதிகாரிகள் என யாருமே இதுவரை கண்டுபிடிக்காமல் இருந்தது எப்படி என்பது பெரும் அதிர்ச்சியாக உள்ளது. நாட்டில் தயாரிக்கப்படும் அனைத்து மருந்துகளும் ஏதாவது ஒரு மாநிலத்தின் அரசு மருந்து தர கட்டுப்பாட்டு அதிகாரிகளின் ஆய்வுகளுக்கு சென்ற பின்பு தான் விற்பனைக்கு வெளியே கொண்டு செல்ல அனுமதி கிடைக்கும். அதேபோன்ற தர ஆய்வகம் புதுச்சேரி கோரிமேட் டிலும் செயல்படுகிறது. ஆனால் இந்த போலி மருந்துகள் எந்த ஆய்வகத்திற்கு செல்லாமல் எப்படி வெளி மாநில பார்மசிகளுக்கு விற்பனைக்கு சென்றது. நான்கு ஆண்டுகளில் இந்த தொழிற்சாலையில் பல நுாறு கோடி ரூபாய்க்கு மருந்துகள் தயாரிக்கப்பட்டுள்ளது. வெளி மாநிலத்தைச் சேர்ந்த ஒரு நபர் புதுச்சேரியின் பிரதான இடங்களில் இது போன்ற ஒரு போலி மருந்து தொழிற்சாலையை நடத்த முடியும் என்றால் புதுச்சேரியின் பாதுகாப்பு அமைப்பு மீது கேள்வி எழுந்துள்ளது. இந்த தொழிற்சாலைக்கு பல கோடி ரூபாய்க்கு மருந்துகள் தயாரிக்க மூலப்பொருட்கள் எந்த மாநிலத்தில் இருந்து வந்தது என்ற தகவல்கள் எதுவும் வெளியாகவில்லை. கடந்த சில மாதங்களுக்கு முன்பு 'கோ ப்ரீ' எனும் சைக்கிள் நிறுவன முதலீட்டு திட்டம் பல கோடி ரூபாய் மோசடி, கிட்னி திருட்டு, போலி மருந்து தொழிற்சாலை என வரிசையாக சின்னஞ்சிறு மாநிலமான புதுச்சேரியில் வெளியாகும் அதிர்ச்சிகரமான செயல்களை இரும்பு கரம் கொண்டு ஆட்சியாளர்கள் தடுக்கா விட்டால், பெரிய விபரீதம் ஏற்படும் என்பது உறுதி.

நாட்டிற்கே அவப்பெயர்

புதுச்சேரி மாநிலத்தில் மொத்தம் மற்றும் சில்லறை விற்பனை மருந்து கடைகள் 1,000 உள்ளன. 57 மருந்து தொழிற்சாலைகள் லைசென்ஸ்வுடன் இயங்கி வருகின்றன. இந்த மருந்து தொழிற்சாலைகளில் பிரபல நிறுவனங்களுக்கு ஒப்பந்த அடிப்படையில் பல்வேறு மருந்துகள் அவர்களின் கூறும் தரக் கட்டுப்பாட்டுடன் தயாரித்து அனுப்பப்படுகிறது. இது மட்டுமின்றி ஆண்டொன்றிற்கு 2,000 கோடி ரூபாய் அளவிற்கு மருந்துகள் வெளிநாட்டு தர கட்டுப்பாட்டுடன் தயாரிக்கப்பட்டு, ஆப்பிரிக்கா உள்ளிட்ட பல்வேறு நாடுகளுக்கு அனுப்பப்படுகிறது. இந்த போலி மருந்து விவகாரத்தால் மேற்கண்ட நாடுகளில் இனி புதுச்சேரியில் இருந்து தயாரிக்கப்படும் மருந்துகளை வாங்குவதற்கு யோசிக்கும். இதனால் பெருமளவு அந்நிய செலாவணி நமது நாட்டிற்கு கிடைக்காமல் தடைபடும். மேலும் நாட்டிற்கும் அவப்பெயரையும் ஏற்படுத்தி உள்ளது. இதனால் மத்திய அரசு அதிகாரிகள் புதுச்சேரியில் விரிவான விசாரணை நடத்தி, சம்பந்தப்பட்ட அதிகாரிகள் மீது கடுமையான நடவடிக்கை எடுக்க தயாராகி வருவதாக கூறப் படுகிறது.