கூலி தொழிலாளி மின்சாரம் தாக்கி பலி

திருக்கோவிலுார் : திருக்கோவிலுார் அருகே சாரம் கட்டும் பணியில் ஈடுபட்ட கூலி தொழிலாளி மின்சாரம் தாக்கி இறந்தார்.திருக்கோவிலுார் அடுத்த மணம்பூண்டி, உமா மகேஸ்வரி தெருவில் வீடு கட்டிவருபவர் ஜோனதாஸ் மகன் அருளப்பன், 37; நேற்று இவரது வீட்டின் மாடியில் சாரம் கட்டும் பணி நடந்து வந்தது. தகடி கிராமத்தைச் சேர்ந்த சுப்பிரமணியன் மகன் ஏழுமலை, 38; பணியில் ஈடுபட்டிருந்தார்.மதியம் ஒரு மணி அளவில் வீட்டுக்கு மேலே சென்ற மின் ஒயர் உரசியதால் மின்சாரம் தாக்கி ஏழுமலை காயமடைந்தார். அவரை அருகில் இருந்தவர்கள் மீட்டு உடனடியாக திருக்கோவிலுார் அரசு மருத்துவமனைக்கு அழைத்துச் சென்றனர். அவரை பரிசோதித்த டாக்டர்கள் , அவர் இறந்து விட்டதாக தெரிவித்தனர்.இது குறித்து அவரது மனைவி உதயா கொடுத்த புகாரின் பேரில் அரகண்டநல்லுார் போலீசார் வீட்டின் உரிமையாளர் மீது வழக்குப் பதிந்து விசாரித்து வருகின்றனர்.