தண்ணீர் வரத்து கால்வாய் அடைப்பால் நெய்க்குப்பம் ஏரிக்கு நீர் வருவதில் சிக்கல்

வாலாஜாபாத்: நீர்வரத்து கால்வாயில் செடி, கொடிகள் வளர்ந்துள்ளதால், தண்ணீர் வருவது தடைபட்டு நெய்க்குப்பம் ஏரி நிரம்புவதில் சிக்கல் ஏற்பட்டுள்ளதாக விவசாயிகள் கவலை அடைந்துள்ளனர். வாலாஜாபாத் வட்டாரத்திற்கு உட்பட்டது நெய்க்குப்பம் கிராமம். இக்கிராம த்தில், ஒன்றிய கட்டுப்பாட்டிலான 105 ஏக்கர் பரப்பிலான ஏரி உள்ளது. இந்த ஏரி மழைக்காலத்தில் முழுமையாக நிரம்பினால், அத்தண்ணீரைக் கொண்டு 160 ஏக்கர் பரப்பிலான விவசாய நிலங்கள் பாசனம் பெறும். அவளூர் ஏரியில் இருந்து, நெய்க்குப்பம் ஏரிக்கு செல்லும் நீர்வரத்து கால்வாய் உள்ளது. மழைக்காலத்தில் அவளூர் ஏரி நிரம்பி அதன் உபரி நீர் இந்த கால்வாய் வழியாக நெய்க்குப்பம் ஏரிக்கு செல்வது வழக்கம். இதனால், நெய்க்குப்பம் ஏரிக்கு இக்கால்வாய் முக்கிய நீர் ஆதாரமாக இருந்து வருகிறது. இந்நிலையில், அவளூர் ஏரியில் இருந்து நெய்க்குப்பம் ஏரிக்கு செல்லும் நீர்வரத்து கால்வாய் பராமரிப்பு இல்லாத காரணத்தால் செடி, கொடிகள் வளர்ந்து உள்ளன. அதனால், இந்த ஆண்டு பருவமழைக்கு இந்த கால்வாய் வழியாக தண்ணீர் சென்றடைந்து ஏரி நிரம்புவதில் சிக்கல் ஏற்பட்டுள்ளது. எனவே, நெய்க்குப்பம் ஏரிக்கான நீர்வரத்து கால்வாயை சூழ்ந்துள்ள செடி, கொடிகளை அகற்றி துார்வார சம்பந்தப்பட்டத்துறை அதிகாரிகள் நடவடிக்கை எடுக்க வேண்டும் என அப்பகுதி விவசாயிகள் வலியுறுத்தி வருகின்றனர்.