1,000 மரக்கன்றுகள் நடவு பணி தீவிரம்

திருத்தணி: திருத்தணி நகராட்சியில், 1,000 மரக்கன்றுகள் நடவு செய்யும் பணி நடந்து வருகிறது. தற்போது வரை, 500 மரக்கன்றுகள் நடப் பட்டுள்ளன. திருத்தணி நகராட்சியில் 21 வார்டுகள் உள்ளன. நகராட்சி நிர்வாகம், நகர்ப்புற பசுமை திட்டத்தின் கீழ், விளையாட்டு பூங்கா, குளக்கரை, ஏரிக்கரை, உரக்குடில் மற்றும் நகராட்சிக்கு சொந்தமான இடங்களில் 1,000 மரக்கன்றுகள் நட தீர்மானித்து, கடந்த ஒரு மாதமாக மரக்கன்றுகள் நடும் பணி நடந்து வருகிறது. இதுகுறித்து, திருத்தணி நகராட்சி அதிகாரி கூறியதாவது: வனத்துறையினரிடம் இருந்து வேப்பம், புங்கை, தேக்கு உட்பட 13 வகையான மரக்கன்றுகளை வாங்கி, நகராட்சி முழுதும் மரக்கன்றுகள் நட்டு வருகிறோம். இதுவரை, 500 மரக்கன்று நடவு செய்துள்ளோம். மீதமுள்ள 500 மரக்கன்றுகளை, அடுத்த மாதத்திற்குள் நடவு செய்ய உள்ளோம். இதுதவிர, 500 பனை விதைகள் நடவு செய்யவும் திட்டமிட்டுள்ளோம். இவ்வாறு அவர் கூறினார்.