‛வெல்லும் பெண்கள் திட்டம் தமிழக அரசு அறிமுகம்

விருதுநகர்: தமிழக அரசின் பல்வேறு திட்டங்களால் அதிகாரம் பெற்ற பெண்களின் உண்மையான கதைகளை வெளிப்படுத்த வெல்லும் பெண்கள் திட்டம்' செயல்படுத்த திட்டமிடப்பட்டுள்ளது. தி.மு.க., அரசு பொறுப்பேற்றது முதல் தற்போது வரை மகளிர் உரிமைத் தொகை, விடியல் பயணம், மக்களை தேடி மருத்துவம், சுய உதவிக்குழுக்கள், விளையாட்டு, பெண் ஓதுவார்கள், வெற்றி நிச்சயம், நலம் காக்கும் ஸ்டாலின், பெண் தொழில் முனைவோர் உள்ளிட்ட 18 திட்டங்களில் சாதித்த பெண்களின் வெற்றிக்கதைகளை மாநில அளவில் நிகழ்வாக வெளிப்படுத்த தமிழக அரசு திட்டமிட்டுள்ளது. இந்த 18 திட்டங்களில் ஒவ்வொரு மாவட்டத்திற்கும் ஒரு திட்டத்திற்கு தலா இருவர் தேர்ந்தெடுக்கப்பட்டு அவர்களுக்கு நேர்காணல் நடத்தப்படவுள்ளது. கோவை, சேலம், சென்னை, விழுப்புரம், திருச்சி, திருநெல்வேலி ஆகிய இடங்களில் நேர்காணல் நடத்தப்பட்டு அதில் இருந்து தகுதியானவர்கள் தேர்வு செய்யப்பட்டு சென்னையில் முதல்வர் ஸ்டாலின் தலைமையில் நடக்கும் நிகழ்ச்சியில் வெல்லும் பெண்கள் திட்டம்' செயல்படுத்த நடவடிக்கை எடுக்கப்படுகிறது.