வருமான வரித்துறை சோதனை ரூ.100 கோடி வரி ஏய்ப்பு அம்பலம்

பெங்களூரு: பெங்களூரின் பல்வேறு இடங்களில் உள்ள வணிக நிறுவனங்களில் 15 நாட்களாக வருமான வரித்துறை அதிகாரிகள் அதிரடி சோதனை நடத்தினர். ஆவணங்களை கைப்பற்றியதில், 100 கோடி ரூபாய் வரி ஏய்ப்பு நடந்திருப்பது அம்பலமானது. பெங்களூரில் பெரும்பாலான வணிக நிறுவனங்களில் வரி ஏய்ப்பு நடப்பதாக வருமான வரித்துறைக்கு தகவல் கிடைத்தது. இதையடுத்து வருமான வரித்துறை அதிகாரிகள், சரக்கு மற்றும் சேவை வரித்துறை அதிகாரிகள் ஆங்காங்கே சோதனை நடத்துகின்றனர். கடந்த 15 நாட்களாக ஜே.சி.சாலை, சிக்பேட், அவென்யூ சாலை, எஸ்.பி., சாலை, பி.வி.கே., அய்யங்கார் சாலையில் பல்வேறு வணிக நிறுவனங்களில் சோதனை நடந்துள்ளது. எலக்ட்ரானிக் பொருட்கள், விற்பனை வாகன உதிரி பாகங்கள், பரிசு பொருட்கள், உலர்ந்த பழங்கள், சிமென்ட், இரும்பு பொருட்கள் என, பல விதமான கடைகளில், ஆவணங்களை கைப்பற்றி ஆய்வு செய்ததில், வரி ஏய்ப்பு நடந்திருப்பது உறுதி செய்யப்பட்டது. பில் இல்லாமல் சரக்குகளை கொள்முதல் செய்ததும், அதிகமான சரக்குகளை கொள்முதல் செய்து, பில்லில் குறைவாக காண்பித்ததும் கண்டுபிடிக்கப்பட்டது. பல இடங்களில் போலி பில்களை உருவாக்கி உள்ளனர். 40 லட்சம் ரூபாய்க்கும் அதிகமாக வர்த்தகம் நடந்தாலும் ஜி.எஸ்.டி., பதிவு செய்யாமல் வியாபாரம் செய்வதும் கண்டுபிடிக்கப்பட்டது. நகர் முழுதும் 500க்கும் மேற்பட்ட இடங்களில் சோதனை நடத்தி, ஆவணங்களை ஆய்வு செய்ததில் 100 கோடி ரூபாய் வரி ஏய்ப்பு நடந்துள்ளதை அதிகாரிகள் கண்டுபிடித்துள்ளனர். வரி ஏய்ப்பு செய்த வியாபாரிகள் மீது சட்டப்படி நடவடிக்கை எடுக்கப்படும் என, அதிகாரிகள் தெரிவித்துள்ளனர்.