உள்ளாட்சி, நெடுஞ்சாலை துறைகளின் அலட்சியத்தால் ஐயப்ப பக்தர்கள் அவதி

செம்பட்டி: உள்ளாட்சி அமைப்புகள், போலீஸ், நெடுஞ்சாலைத்துறை அலட்சியத்தால் திண்டுக்கல்- குமுளி ரோட்டில் ஐயப்ப பக்தர்கள் அவதிக்குள்ளாகும் அவலம் தொடர்கிறது. திண்டுக்கல், தேனி மாவட்டங்களின் இணைப்பு சாலை தேசிய நெடுஞ்சாலை வசம் உள்ள போதும் வழித்தடத்தில் வாகன ஓட்டிகளுக்கான அடிப்படை வசதிகளை ஏற்படுத்துவதில் தொய்வு நிலவுகிறது. மேம்பாட்டு பணிகளில் அதிகாரிகள் அலட்சியத்தால் குறுகலான பகுதிகள் போதிய எச்சரிக்கை அறிவிப்பு இல்லாத இடங்களில் அடுத்தடுத்து விபத்துக்கள், உயிர் பலிகள் அரங்கேறுவது வாடிக்கையாகி விட்டது. இந்த ரோட்டில் சில வாரங்களாக ஐயப்ப பக்தர்களின் வருகை வெகுவாக அதிகரித்துள்ளது. சபரிமலை செல்லும் வாகனங்களின் போக்குவரத்து அதிகரித்தபோதும் இதற்கேற்ற முன் ஏற்பாடுகளை மேற்கொள்வதில் போலீஸ்,உள்ளாட்சி அமைப்புகள், நெடுஞ்சாலை துறையின் நடவடிக்கைகளில் பின்னடைவு உள்ளது. இப்பிரச்னையால் ஐயப்ப பக்தர்கள் அவதிக்குள்ளாகின்றனர். மாவட்ட நிர்வாகம் ஐயப்ப பக்தர்களுக்கான பாதுகாப்பான பயணம், அடிப்படை வசதிகளை ஏற்படுத்தும் நடவடிக்கைகளை முடுக்கி விட வேண்டும். --அ.தி.மு.க., கிழக்கு மாவட்ட இளைஞர் பாசறை தலைவர் ராஜேந்திரன் கூறுகையில்,'' திண்டுக்கல்லில் இருந்து குமுளி வரை ரோட்டின் அகலத்தை 7 மீட்டரில் இருந்து 10.5 மீட்டராக மாற்றும் பணி சில மாதங்களுக்கு முன் நடந்தது. சபரிமலை ஐயப்ப பக்தர்கள் மட்டுமின்றி முக்கிய சுற்றுலாத் தலமான கொடைக்கானல் செல்வதற்கும் பிற மாவட்டங்களில் இருந்து இத்தடத்தை பயன்படுத்தும் நிலை உள்ளது வார இறுதி நாட்களில் இத்தடத்தில் கணிசமான அளவில் வாகன போக்குவரத்து இருக்கும். இருந்தம் இத்தடத்தில் வாகன ஓட்டிகளுக்கான ஓய்வு பகுதி, அவசரகால தொடர்பு எண்கள், மருத்துவம், குடிநீர், கழிப்பறை உள்ளிட்ட பாதுகாப்பான பயணத்திற்கான அம்சங்கள் ஏற்படுத்துவதில் தற்போது வரை தொய்வு நீடிக்கிறது'' என்றார்.