ரூ.80,000க்கு பருத்தி ஏலம்

மல்லசமுத்திரம், திருச்செங்கோடு வேளாண்மை உற்பத்தியாளர்கள் கூட்டுறவு விற்பனை சங்கத்தின், மல்லசமுத்திரம் கிளையில் வாரந்தோறும் புதன்கிழமை பருத்தி ஏலம் நடந்து வருகிறது. அதன்படி நேற்று நடந்த ஏலத்தில் மங்களம், பள்ளக்குழி அக்ரஹாரம், செண்பகமாதேவி, சின்னகாளிப்பட்டி, கொல்லப்பட்டி, சந்திரம்பாளையம், ராமாபுரம், பருத்திப்பள்ளி, கொளங்கொண்டை, திம்மிபாளையம், பள்ளிப்பட்டி, கருங்கல்பட்டி, சோமணம்பட்டி உள்ளிட்ட பகுதிகளை சேர்ந்த விவசாயிகள், தலா, 60 கிலோ எடைகொண்ட, 48 மூட்டைகளை விற்பனைக்கு கொண்டு வந்திருந்தனர். இதில், பி.டி., ரகம் ஒரு குவிண்டால், 6,501 ரூபாய் முதல், 7,555 ரூபாய்; கொட்டு பருத்தி, 3,998 ரூபாய் முதல், 3,999 ரூபாய் என, மொத்தம், 80,000 ரூபாய்க்கு பருத்தி விற்பனையானது. அடுத்த ஏலம் வரும், 26ல் நடக்கிறது.