சேவூர் பெருமாள் கோவிலில் இன்று கும்பாபிேஷகம்

அவிநாசி : சேவூர் ஸ்ரீ கல்யாண வெங்கட்ரமண சுவாமி கோவிலில் இன்று கும்பாபிஷேகம் நடைபெறுகிறது. சேவூரில், பழமை வாய்ந்ததாக போற்றப்படும் ஸ்ரீ கல்யாண வெங்கட்ரமண பெருமாள் கோவிலில் கும்பாபிஷேக மராமத்து திருப்பணிகள் தொடர்ந்து நடந்தது. கி.பி. 12-ம் நுாற்றாண்டுக்கு முன்பு, கொங்குச் சோழர்களால் கோவில் கட்டுமானம் கட்டப்பட்டதாக வரலாற்று ஆய்வுகள் கூறுகிறது. கொங்கு பாண்டியர்கள் காலத்தில், வட பரிசர நாட்டின் 'செம்பியன் கிழாநதி நல்லுார்' என அழைக்கப்பட்டது. சோழர்களும் பாண்டியர்களும் வழிபட்டு வந்த புராதனமிக்க இக்கோவிலில், சொர்க்கவாசல் அமைத்து மதில் சுவர் கட்டுதல், முகப்பு தோரண வாயில் அமைத்து மதில் சுவர் கட்டுதல், கோவில் வளாகத்திற்குள் நடைபாதை கல் தளம் அமைத்தல், மூலவர் விமானம், மகாலட்சுமி விமானம், ஆண்டாள் விமானம், பஞ்சவர்ணம் தீட்டுதல், மகா மண்டபம் முன்பு ஓட்டுக்கரை மண்டபம் அமைத்தல், புதிய மடப்பள்ளி அமைத்தல் ஆகிய கும்பாபிஷேக மராமத்து திருப்பணிகளை, உபயதாரர்கள் மூலம் அறநிலையத் துறையினர் மேற்கொண்டனர். இன்று காலை 7:45 மணிக்கு விமான கலசங்களுக்கு மஹா கும்பாபிஷேகமும், 8:25 மணிக்கு மூலஸ்தானத்திற்கு மஹா கும்பாபிஷேகமும் நடைபெறுகிறது. பின்னர் தசதானம், தரிசனம், மகா தீபாராதனை, பிரசாதம் வழங்குதல் ஆகிய நிகழ்ச்சிகள் நடக்கின்றன. மாலை திருக்கல்யாண உற்சவம் ஸ்ரீதேவி பூதேவி சமேத கல்யாண வெங்கட்ரமண பெருமாள் கருட வாகனத்தில் திருவீதி உலா ஆகியவை நடைபெறும். சேவூர் ஊர் பொதுமக்கள் மற்றும் திருப்பணி உபயதாரர்கள் சார்பில் பக்தர்களுக்கு காலை 7:00 மணி முதல் அன்னதானம் வழங்கப்படுகிறது. --- மின்னொளியில் ஜொலிக்கும் சேவூர், ஸ்ரீகல்யாண வெங்கட்ரமண சுவாமி கோவில். தேவியருடன் ஸ்ரீகல்யாண வெங்கட்ரமணப் பெருமாள் சோழர், பாண்டியர்கள் பங்களிப்பு இக்கோவில், பாண்டியர்களின் கல்வெட்டுகள் கூற்றுப்படி 14ம் நுாற்றாண்டை சேர்ந்த சுந்தரபாண்டியனின் ஆட்சியில் சுந்தரபாண்டியர் விண்ணகரம் எனவும்; கி.பி. 13 மற்றும் 14ம் நுாற்றாண்டில் சோழர்கள் மற்றும் பாண்டியர்களால் அணையா தீபங்களுக்காகவும்; பூஜைகளுக்காக தேங்காய்கள், பழங்கள், நெய்வேத்தியம் செய்வதற்கும் பொற்காசுகள் வழங்கப்பட்டதாகவும் கல்வெட்டுகளில் சான்றுகள் உள்ளன. தற்போதுள்ள பலிபீடம் 14ம் நூற்றாண்டின் ஹொய்சால மன்னர் மூன்றாம் வீரவல்லாளன் காலத்தில் தென்னவத்தராயன் என்ற விக்ரம கண்ணப்பனால் கட்டப்பட்டது என சான்று உள்ளது.