கோவை: தென்னிந்திய பாதுகாப்பு தளவாட உபகரண வினியோகஸ்தர்கள் மற்றும் ஸ்டார்ட்அப் சங்கம் (சிடா) சார்பில், பாதுகாப்பு தளவாட உற்பத்திக் கண்காட்சி, கோவை ஈச்சனாரி, ரத்தினம் கிராண்ட் ஹாலில் நடக்கிறது. கண்காட்சியில், ராணுவம் சார்ந்த அரசு மற்றும் பொதுத்துறை நிறுவனங்கள் பங்கேற்றுள்ளன. இதில், குண்டு துளைக்காத கவச உடை முதல் போர் விமானத்தின் உதிரி பாகங்கள் வரை காட்சிப்படுத்தப்பட்டுள்ளன. இதற்கான வழிமுறைகள், டெண்டரில் பங்கேற்பது, தரச்சான்று என அனைத்து வகையான வழிகாட்டுதல்களும் கண்காட்சியில் வழங்கப்படுகின்றன. ரயில்வே பிரேக் சீல், எலாஸ்டேமெரிக் பேட், ரயில்வே பேரிங் சீல், லேட்டரல் பம்ப் ஸ்டாப் என பல நூற்றுக்கணக்கான உதிரிபாகங்கள் காட்சிப்படுத்தப்பட்டுள்ளன. விமானப்படை சார்பில் அமைக்கப்பட்டுள்ள கண்காட்சியில், கர்நாடக பிடார் விமானப்படைத்தளத்தில் உள்ள ஜாகுவார், ஹாக் போர் விமானங்களுக்கான டயாப்ரம்; பிளாட்டஸ் பி.சி.,7 எம்.கே.,2 பயிற்சி விமானத்துக்கான லேண்டிங் லைட் அசெம்பிளி; ஹெச்.எஸ் 748 அவ்ரோ விமானத்துக்கான பில்டர் அசெம்பிளி மற்றும் பிரஷர் பிளேட், டிஸ்க், எக்ஸாஸ்ட் சிஸ்டம் கேஸ்கட், புஷ் ராடு அசெம்பிளி என, ஏராளமான உதிரிபாகங்கள் காட்சிப்படுத்தப்பட்டுள்ளன. ஜாக்குவார், ஹாக் போன்ற போர் விமான உதிரிபாகங்களை கோவை சிறு, குறு தொழில் நிறுவனங்கள் தயாரித்து வழங்க, ஆர்டர்களைப் பெற இயலும். இவை தவிர, ஹெச்.ஏ.எல்., தனியார் மற்றும் பொதுத்துறை கப்பல் கட்டும் நிறுவனங்கள் பங்கேற்று, தங்களுக்குத் தேவையான உபகரணங்களைக் காட்சிப்படுத்தியுள்ளன. கு ண்டுதுளைக்காத ஆடைகள், பாதுகாப்புக் கவசங்கள், வெப்பஅலை உணரிகள், ஆயுத பயிற்சிக்கு உதவும் மெய்நிகர் (வி.ஆர்.,) உபகரணங்கள் என, பாதுகாப்பு துறை சார்ந்த ஏராளமான வாய்ப்புகளை, எம்.எஸ்.எம்.இ., நிறுவனங்கள் பயன்படுத்திக் கொள்ளும் வகையில் கண்காட்சி அமைந்துள்ளது. மூன்று நாள் கண்காட்சி இன்று நிறைவடைகிறது.
'ஸெட்' சான்று இலவசமாக பதிய வாய்ப்பு
எம்.எஸ்.எம்.இ., துறையின் போட்டித்தன்மையை அதிகரிக்கும் விதத்தில், மத்திய அரசு, 'ஸெட்' (இஸட்.இ.டி.,) சான்றிதழ் திட்டத்தை செயல்படுத்தி வருகிறது. பூஜ்ஜிய குறைகள், பூஜ்ஜிய விளைவு (ஜீரோ எர்ரர் ஜீரோ எபெக்ட்) என்பதன் சுருக்கமே 'ஸெட்' ஆகும். 'ஸெட்' சான்று பெறுவதற்கான வழிகாட்டுதல் வழங்கப்படுகிறது. இதற்காக பிரத்யேக ஸ்டால் அமைக்கப்பட்டுள்ளது. 'உத்யம்' பதிவு பெற்ற குறு, சிறு, நடுத்தர நிறுவனங்கள் இச்சான்றுக்கு விண் ணப்பிக்கலாம். வெண்கலம், வெள்ளி, தங்கம் என மூன்று படிநிலைகளில் இச்சான்றுகள் வழங்கப்படுகின்றன. விண்ணப்பக்கட்டணத்தில் குறு நிறுவனங்களுக்கு 80 சதவீதமும், சிறு நிறுவனங்களுக்கு 60 சதவீதமும், நடுத்தர நிறுவனங்களுக்கு 50 சதவீதமும் சலுகை வழங்கப்படுகிறது. மகளிர் தொழில்முனைவோர் நடத்தும் நிறுவனங்களுக்கு கட்டணத்தில் இருந்து தள்ளுபடி வழங்கப்படுகிறது.
சலுகைகள் ஏராளம்
இச்சான்று கட்டாயமல்ல. ஆனால், இச்சான்று பெறுவதால் ஏராளமான சலுகைகளைப் பெற இயலும். அரசு டெண்டர்களில் பங்கேற்கும்போது வரிச்சலுகை மற்றும் முன்னுரிமைகள் வழங்கப்படும். மாநில அரசும் நிதிச் சலுகைகளை வழங்குகிறது. வங்கிகள், கடன் விண்ணப்பங்களின் மீதான பரிசீலனைக் கட்டணம், வட்டி போன்றவற்றில் சலுகைகளை வழங்குகின்றன. ஜெம் போர்டலில் சலுகைகள் வழங்கப்படும். ரூ.2 லட்சம் வரை, வழிகாட்டல் உதவிகள், தொழில்நுட்ப மேம்பாட்டுக்காக ரூ. 3 லட்சம் வரையிலான நிதியுதவி, பரிசோதனை, தயாரிப்புகளின் மீதான சான்றுகளுக்கு ரூ.50 ஆயிரம் வரையிலான நிதியுதவி வழங்கப்படுகிறது. 'ஸெட்' உறுதிமொழியை ஏற்கும் எம்.எஸ்.எம்.இ., நிறுவனத்துக்கு இணைவு வெகுமதியாக ரூ.10 ஆயிரம் வழங்கப்படுகிறது. மேலும் விவரங்களுக்கு, 9444182838 என்ற எண்ணில் தொடர்பு கொள்ளலாம்.
கண்காட்சியில் இன்று
'தற்சார்பு இலக்கை எட்டுவதில், தொழில்வளர் மையங்கள் (இன்குபேஷன் மையம்) மற்றும் ஸ்டார்ட்அப் நிறுவனங்கள்', 'இந்திய அரசின் ஆதரவு மற்றும் உலகளாவிய பாதுகாப்பு உபகரண வினியோகச் சங்கிலிக்கு இந்தியாவின் ஆயத்தம்', 'இந்திய கடற்படையில், ஸ்டார்ட்அப் மற்றும் எம்.எஸ்.எம்.இ., நிறுவனங்களுக்கான வாய்ப்புகள்' ஆகிய தலைப்புகளில் விளக்கவுரைகள் வழங்கப்படுகின்றன. நிகழ்வின் இறுதியில், சிறப்பான நிறுவனங்களுக்கு விருதுகள் வழங்கப்பட உள்ளன.