சோழவரத்தில் காணாமல் போனவர் கொசஸ்தலை ஆற்றில் சடலமாக மீட்பு

மீஞ்சூர்: இரு நாட்களுக்கு முன் காணாமல் போன தனியார் நிறுவன தொழிலாளி, கொசஸ்தலை ஆற்றில் சடலமாக மீட்கப்பட்டார். சோழவரம் அடுத்த நாரணம்பேடு கிராமத்தைச் சேர்ந்தவர் வினோத்குமார், 35. இவர், எண்ணுாரில் உள்ள தனியார் நிறுவனத்தில் பணிபுரிந்து வந்தார். கடந்த 27ல் பணிக்கு செல்வதாக கூறி சென்றவர் இரவு வரை வீடு திரும்பவில்லை. அதே சமயம், வினோத்குமார், 'தனக்கு கடன் பிரச்னை அதிகமாக உள்ளது. மனஉளைச்சலில் இருக்கிறேன்' என, வீடியோ பதிவு செய்து, தங்கை மற்றும் மனைவியின் மொபைல்போன்களுக்கு அனுப்பியுள்ளார். இதனால், பதற்றமடைந்த அவரது குடும்பத்தினர், சோழவரம் காவல் நிலையத்தில் புகார் அளித்தனர். அருகில் உள்ள காவல் நிலையங்களுக்கு தகவல் தெரிவித்து, சோழவரம் போலீசாரும் தேடி வந்தனர். நேற்று, மீஞ்சூர் அடுத்த சீமாவரம் பகுதியில் உள்ள கொசஸ்தலை ஆற்றின் கரையோரம் ஆண் சடலம் ஒதுங்கி இருப்பதாக போலீசாருக்கு தகவல் வந்தது. மீஞ்சூர் போலீசார் அங்கு சென்று சடலத்தை கைப்பற்றி விசாரித்ததில், இறந்த நபர் சோழவரத்தைச் சேர்ந்த வினோத்குமார் என்பதும், கடன் பிரச்னையில் வினோத்குமார் ஆற்றில் குதித்து தற்கொலை செய்து கொண்டதும் தெரிந்தது. மீஞ்சூர் மற்றும் சோழவரம் போலீசார் விசாரிக்கின்றனர்.