நிழற்குடை இல்லாததால் பயணியர் அவதி

திருமழிசை: திருமழிசை அடுத்த நேமம் பகுதியில் பயணியர் நிழற்குடை இல்லாததால், பயணியர் மற்றும் மாணவ - மாணவியர் கடும் அவதிப்பட்டு வருகின்றனர். திருமழிசை அருகே நேமம் ஊராட்சி அமைந்தள்ளது. இங்கிருந்து, சென்னை மற்றும் திருவள்ளூருக்கு அப்பகுதி மக்கள் மற்றும் பள்ளி, கல்லுாரி மாணவ -- மாணவியர் ஏராளமானோர் சென்று வருகின்றனர். திருமழிசை - ஊத்துக்கோட்டை நெடுஞ்சாலையில் உள்ள நேமம் ஊராட்சியில் பேருந்து நிறுத்தம் உள்ளது. கடந்த 15 ஆண்டுகளுக்கு மேலாக பயணியர் நிழற்குடை இல்லாததால், அப்பகுதி மக்கள் மற்றும் பள்ளி, கல்லூரி மாணவ - மாணவியர் வெயிலிலும், மழையிலும் கடும் சிரமப்பட்டு வருகின்றனர். பலமுறை ஊராட்சி நிர்வாகத்திடம் புகார் அளித்தும், தற்போது வரை எவ்வித நடவடிக்கையும் எடுக்கவில்லை என, அப்பகுதி மக்கள் குற்றஞ்சாட்டுகின்றனர். எனவே, சம்பந்தப்பட்ட அதிகாரிகள் ஆய்வு செய்து, நேமம் ஊராட்சியில் பயணியர் நிழற்குடை அமைக்க நடவடிக்கை எடுக்க வேண்டும் என, பயணியர் மற்றும் மாணவ -- மாணவியர் கோரிக்கை விடுத்துஉள்ளனர்.