பிளாஸ்டிக் பாட்டில் சேகரிப்பு புதிய முயற்சி பயன் தரும்

எ ங்கு நோக்கினும் பிளாஸ்டிக் பாட்டில்கள்தான். ஆறுகள் உள்ளிட்ட நீர்நிலைகள், கழிவு நீர் கால்வாய்கள், பாசன வாய்க்கால்கள் உள்ளிட்ட அனைத்தையும் பிளாஸ்டிக் பாட்டில்கள் ஆக்கிரமித்து, கடும் சுற்றுச்சூழல் பாதிப்பை ஏற்படுத்தி வருகின்றன. இவற்றை கட்டுப்படுத்துவது என்பது சவாலான காரியம்; இருப்பினும், சுற்றுச்சூழலை பாதிக்காத வகையிலான நடவடிக்கைகளை மேற்கொள்ள நம்மால் இயலும். இதற்காகவே, பிளாஸ்டிக் பாட்டில்களை சேகரிக்கும் நவீன தொழில்நுட்பத்துடன் கூடிய இயந்திரங்கள் தற்போது புழக்கத்தில் உள்ளன. பஸ் ஸ்டாண்ட், ரயில் நிலையம்; சினிமா தியேட்டர்கள், மால்கள், கடைவீதி, சந்தை உள்ளிட்ட பொதுமக்கள் கூடும் இடங்களில் பிளாஸ்டிக் பாட்டில்கள் சேகரிக்கும்இயந்திரங்களை வைப்பதன் மூலம், அவை ரோட்டில் வீசப்படுவது குறைய வாய்ப்பு உள்ளது. சேகரிக்கப்படும் பிளாஸ்டிக் பாட்டில்களை பல்வேறு மாற்று உபயோகங்களுக்கும் பயன்படுத்த வாய்ப்பு உள்ளது என்பதால், இது பயனுள்ளதாகவே இருக்கும். சமீப நாட்களாகவே, திருப்பூர் சுற்றுவட்டார பகுதியில், குப்பை பிரச்னை விஸ்வரூபம் எடுத்து வரும் நிலையில், குறைந்த செலவில், சுற்றுச்சூழலை பாதுகாப்பதற்கான முயற்சியாக, பொது இடங்களில் பிளாஸ்டிக் பாட்டில்கள் சேகரிக்கும் இயந்திரங்களை அமைக்க நடவடிக்கை எடுக்க வேண்டும். உள்ளாட்சி அமைப்புகள் இதுகுறித்து சிந்தித்து செயல்பட வேண்டியது காலத்தின் கட்டாயம்.